Асау кер ат жүрмейді асыққанда,
Еркін даусым келмейді қарлыққанда.
Асау кер ат бойында мін болар ма,
Сұлу қызға тағатын сын болар ма!
Жылқы ішінде ала жүр,
Тай секілді, ай-угай.
Оны қуып бала жүр,
Ай секілді ай-угай.
Ат байладым ақ үйдің кермесіне,
Көз салмадым біреудің бермесіне.
Ат байладым ақ үйдің белбеуіне,
Шашақ төгер кербез қыз белбеуіне.
Жылқы ішінде ала жүр,
Тай секілді, ай-угай.
Оны қуып бала жүр,
Ай секілді ай-угай.
Сәуле беріп түндегі туған айдай,
Асыр салған өрісте құлын-тайдай.
Той-думанды, мереке болған жерде
Қыз-бозбала жиылып, ән шырқайды-ай.
Жылқы ішінде ала жүр,
Тай секілді, ай-угай.
Оны қуып бала жүр,
Ай секілді ай-угай.